أغاني مصرية
ديوان شعر بالعامية المصرية
2024 م
إهداء
إلى زوجتي الحبيبة؛ وإلى أبنائي
عبدالرحمن
ندى
عبدالملك
ربّ احفظهم بما تحفظ به عبادك المخلصين
إصدارات
دار أمارجي
للنشر والطباعة والتوزيع
اسم
الكتاب : أغاني مصرية
نوعه
: ديوان شعر عامية
اسم
المؤلف : متولي محمد متولي بصل
نوع
الكتاب : ورقي قياس 14 × 21
الطبعة الأولى : 2024 م
طباعة : دار أمارجي للطباعة والنشر – العراق
حقوق الطبع محفوظة للمؤلف
لا
يسمح بإعادة إصدار هذا الكتاب أو أي جزء منه أو تجزئته في نطاق استعادة المعلومات
أو نقله بأي شكل من الأشكال المعروفة حاليا أو التي ترد مستقبلا دون إذن خطي مسبق
من المؤلف.
الآراء الواردة في هذا الكتاب لا تعبر
بالضرورة عن توجه الدار بل تعبر عن رأي المؤلف وتوجهه في المقام الأول وما بداخل
الكتاب مسئولية الكاتب فقط .
ديوان
شعر عامية
أغاني مصرية
( بين نهار الكوميديا وليل التراجيديا )
متولي بصل
2024 م
أنا إن ظلمتك يوم
أو قلت شيء زعَّلك
لا تكيل عتاب و لا لوم
وتقول قصدت أظلمك
لنا نبي معصوم
و لا كنت حتى مَلك
*********
مونولوج
أيوه موظف
أيوه موظف .. .. أيوه موظف
بس الحالة بعافية شوية
لو يوم زوجتي قالت لي اتصرّف
نفسنا ناكل أكلة شهية
بس بلاش العدس ابو جبة
و بلاش الفول و الطعمية
دانا لو محجوزة في مستوصف
كانوا جابوا لي فراخ مشوية
*********
نفسنا مرة تا
خدنا المصيف
و ولادنا يبلبطوا في المية
نتفسح ع النيل في الطفطف
نسهر في الجربي السياحية
زوجتي مفكرة إني بخيل
و ولادي فاكرينها تكية
مش عارفين إيه يعني موظف
و مرتبه كام ورقة بمية
*********
لولا الغلا و الكوى كنت
اصرف
و لا اشكك أو يبقى علي
ّ
بس مهيتي إيه لو تعرف
ما تكفيش بنزين عربية
و احنا ما شا الله سبع أنفار
أكل و لبس و دوا يا عينيا
حسبة برما انا محتاج مصرف
لأ محتاج معجزة إلهية
*********
مرة قالت لي نفسي أنضف
أرنب و اطبخه بالملوخية
رديت يعني اسرق و لا اخطف
عيز
اني اروح النار يا ولية
الأرنب ها نشوفه في الجنة
و كفاية علينا الملوخية
و اللحمة علينا ها تتعطف
غصب
ٍ عنها يوم الأضحية
*********
أنا يا مراتي حيا الله موظف
مش صاحب بنك و لا وسية
26 / 5 /2018 م
مونولوج
الدنيا مظاهر كدابة
علشان عربيتي و مدامي
و عشان دايما شايل
شنطة
و كمان من لبسي و هندامي
لابس بدلة قيمة و
كرافتة
و لا موديل جزمتي و حزامي
عاملين ألابندا في
الحتة
كل الناس فاكريني محامي
أو دكتور أو يمكن رتبة
أتكلم يسمعوا لكلامي
حتى و لو كان كله أونطه
أطلب حاجة الاقيها قدامي
و البياع يبعت لنا
دستة
أكل و لبس و لا في أحلامي
كله هدايا حتى
التورتة
اللي عاوز توصية يا مامي
و اللي
عاوز من حضرتي واسطة
حتى ابني له قطة سيامي
لو عطست أو جالها
زغطة
كل الناس تقلق لي منامي
ألف سلامة يا بيه
للقطة !
*********
الدنيا مظاهر كدابة
و الناس بيحبوا التوشيش
الطيب لو أهله غلابة
يتكاتروا عليه بالشواكيش
و النصاب ابن النصابة
يتهنى ما بينهم و يعيش
ها تقول لي دي دنيا و
مش غابة
لأ غابة يا
عم الدرويش
و
اللي يعيش بقى وسط ديابة
يأكل اللحمة و ينسى العيش
*********
لا تقول لي بقى عيش و لا
ملح
كل الناس عايشين بالغش
و اللي ضميره رماه ع الصح
زي الدود منقوع في المش
اللي في قلبه يا
ناس ميت جرح
يعمل إيه بكلمة معلهش
مونولوج
موس الحلاق
ليه بيقولوا عليَّ سوابق
ليه فاكريني وش
خناق
وانا و لا يوم فكرت اتخانق
و لا يوم حتى مشيت
في طلاق
من بيتي لشغلي طوالي
طيب قوي عمري
وأخلاق
*********
و لا عشان كام بشلة في وشي
الله يجازي موس
الحلاق
كل ما اروح له يحلق دقني
لازم يحفر فيها
أنفاق
واما أقصر شعري ضروري
يفتح فيه كام حارة
وزقاق
*********
كل ما أقول ولله ما انا حالق
شعري يطول زي
المشتاق
والاقيني تحت إيديه ع الكرسي
بنهج زي ما اكون في
سباق
خايف يحلق لي على الزيرو
ويقول لي دي موضة
وأذواق
*********
أعمل إيه أكتر من إني
جبت لي مكنة ماركة
هير
واتعلمت عليها انا وابني
كل يومين نعمل
تغيير
يوم أحلق له ويوم يحلق لي
واهو بالمرة كمان
توفير
*********
حتى مراتي شافتني قالت لي
إيه رأيك نفتح
كوافير
فكرة خطيرة قوي ومجنونة
بس ها نكسب منها
كتير
قلت لها هنحتاج لمحل
قالت عرض الشقة
كبير
نقسمها لحد ما تنحل
قلت لها دي محتاجة
تفكير
قالت و لا تفكير و لا حاجة
مش عايزين لحظة تأخير
*********
الشقة بقت زي الشارع
لأ .. .. زي ميدان
التحرير
ستات طالعة وستات نازلة
حاجة تخلي العقل
يطير
اللي شعرها قبة جامع
واللي شعرها مدهون
جير
واللي معاها ابنها أو اخوها
واللي د جوزها
واللي شوفير
كل يومين أدخل في خناقة
لحد ما وشي اتملا
تعاوير
وبقيت فعلا وش سوابق
بلطجي ومسجل وخطير
الله يجازي موس الحلاق
اللي بسببه ما شفتش
خير
مونولوج
ولي العهد
علشان أخلف أنا في النور
واثبت حق ولي العهد
وابني يا خلق يعيش مستور
و لا يسمعش كلام من
حد
لازم ورقة من الدكتور
زي شهادة بخط اليد
أنا من غيرها ألف وادور
واخبط راسي في الحيط
تتهد
*********
دكتور مشهور عنده عيادة
قال قدامكوا يا
حضرات بدري
رحنا له بعدها زي العادة
نطمن قال لي انزل
إجري
دي مراتك على وش ولادة
قبل ما تولد عاوز
أجري
وإلا ابنك ما يخدش شهادة
هات لي فلوسي يا حضرة دوغري
*********
اتصرفت ازاي مش عارف
بس المبلغ ناقص ألف
ما هو طالب مبلغ مش هايف
حاجة كبيرة فوق
الوصف
رحت له باللي معايا وانا خايف
وشرحت له حالتي
بالحرف
قام لبسني يا ناس وانا واقف
تهمة سرقة ونصب
وخطف
*********
علشان أخرج وابني في حضني
اضطريت ابيع نص
العفش
ما الدكتور مش راضي يسيبني
إلا وانا خارج
بكلبش
حلفان إنه لازم يسجني
واني أنام كام ليلة
ع البرش
و لا همه لا مراتي و لا ابني
مش همه يا ناس غير
القرش
*********
الله يرحم زمن الداية
فين أيامها دي كانت
نعمة
شغلتها مش بس هواية
خبرة وعن تجربة مش
لخمة
قول فيها ألف حكاية وحكاية
وكفاية قلبها كان
فيه رحمة
مش اروح أخلف تبقى جناية
واتعلق كده زي
اللحمة
*********
جهزي نفسك
جهِّزي نفسك واستنيني
وانا في خلال سنتين
تلاقيني
راجع ومعايا
الألفات
*********
الشقة فيلا في مارينا
والشبكة هاشيلها في
فاترينة
والمهر أنا هكتبه
في شيكات
*********
وهأقدم لك أغلى هدية
آيفون أمريكي وعربية
وبوتيك و لا كل
البوتيكات
*********
وفي روما ولندن وباريس
وموناكو ومدريد
وجنيف
هنقضي أحلى الأوقات
*********
تبقي انتي هانم وانا بيه
ونبقشش بالألف جنيه
ونقول إحنا
المليونيرات
*********
وتروحي بقى للكوافير
ده بيعمل م القش حرير
ويخلي فسيخك شربات
*********
ونزور سوا ملجأ أيتام
ونوزع كشاكيل
وأقلام
وعلب مليانة حلويات
*********
بيبان عليك
من كلمة اتغير حاله
لقى نفسه قوام في
النار
بقى يبكي على اللي جرى له
مع إنه هو اللي
اختار
القلب له يعشق واحدة
راح هو عشق الاتنين
بقى عامل زي الوردة
عطشانة ما بين
نهرين
ولا طال لا الأولى ولا التانية
ورجع وفي قلبه
جرحين
*********
أجمل من مواويل العاشقين
اللي انت حاولت
تغنيها
أحلى من قصص الحب
اللي انت بتسمعها
وتحكيها
إن انت تحب بكل مشاعرك
وتلاقي حبيب يصفى
لك
وتحس بنار أشواقه في قلبك
وفي جنة حبه تلاقي
آمالك
*********
إزاي تطلب مني أخلص لك
وانت بتعشق غيري
عليَّه
وازاي أنا اسامحك على جرحك
وانت ما زلت بتلعب
بيَّه
لو كنت بتخلص لي حقيقي
كنت أشيلك جوه
عينيَّه
*********
لا تلوم على قلبي و لا تعاتبه
لو كنا صحيح أحباب
مين فينا يا روحي جار على حبه
وفتح للغيرة الباب
والغيرة لو انت تجربها
الغيرة جحيم وعذاب
*********
كل ما افتكر اللي كان بينا أقول
أنا كنت باحلم ..
كنت باحلم
واسأل الليل والنجوم .. الليل يطول
والنجوم نورها
ياخدني ألقاني باحلم
أصحى وافتح عيني النور يزول
والقاني باحلم ..
لسه با حلم
*********
لو عينيك حلفوا لي ألف يمين
عمرك ما حبيت حد
غيري
أحلف عينيك صادقين
واكذِّب إحساسي
وضميري
بس مشكلتك في كدبك
إنه شيء بيبان عليك
واللي بتداريه في قلبك
أقدر أعرفه من
عينيك
*********
لوم على قلبك
لوم على قلبي اللي حبك
حبَّك الأول
لوم على حبي وهو
حبي لك قليِّل
لوم كمان نظرة عينيك
دي اللي شدِّت قلبي
ليك
واللي قادت نار هواك جواه
وخلتني أعيش أحلم
سنين العمر بيك
*********
لوم على عينيك قبل مني
دول خدوني غصب عني
توهوني ودوبوني
غرَّقوني في بحر
حبَّك
*********
كنت في الأول بتظهر لي الحنان
كنت بتبين لي لهفة
وشوق وعطف
وانت عارف إن قلبي من زمان
عاش حزين محروم
سنين من كل عطف
*********
كنت بتقابلني أحس بنبض قلبك
من لمسة إيديك
كنت بتكلمني أشوف شوقك وحبك
لهفة مرسومة في
عينيك
*********
ليه بتبعدني وتبعد عني دلوقتي
ليه بتهجرني
وتتركني لنار حيرتي
*********
ليه بتهدم كل شيء حلو في حياتي
يا اللي كنت بفكر
أوهب لك حياتي
*********
ليه تفوتني وانت أول حب ليَّا
ليه تلومني وانت
ياما لعبت بيَّا
*********
قد ما تعذِّب في قلبي
قد ما اتمسِّك بحبي
وانت مهما ها تبتعد عني
ها تفضل جوه قلبي
*********
حتى لو بعدك يطول
حتى لو بعدك يطول
قلبي تعالى نتوب
قلبي !
تعالى نتوب
عن الهوى وننسى
الحب والأشواق
تعالى يا قلبي نعيش بعيد
في دنيا تانية
مفيهاش دموع
مفيهاش وداع وفراق
وان كان علينا مكتوب
نعشق نحب ندوب
تعالى يا قلبي تعالى
نهرب من المكتوب
وان كان قريب
منك حبيب
إنساه يا قلبي
وابعد بعيد
خلِّي ما بينك وبينه
سدود .. حدود
وإياك تعود
حتى لو ..
حسيت بأشواقه وغرامه
حتى لو ..
صرَّح بحبك للوجود
حتى لو ..
كان القمر ليلة تمامه
حتى لو ..
قدِّم وعود
إياك تعود
*********
عارفك يا قلبي
ها تقول لي لا !
دا الحب سلطان ع القلوب
لكن يا قلبي ده كان زمان
دلوقتي سمس الحب
بتميل للغروب
تعالى يا قلبي
ده ما لوش عليك سلطان
تعالى يا قلبي
نهرب لأي مكان
ويَّاك عينيه
بتلوم عليَّه
زي ما يكون الهوى
وصل إليهم قبل ما يوصل إليك
دول مشتاقين
والشوق ماليهم
أكتر من الشوق اللي بيك !
*********
حبك غنوة
حبك يا حبيبتي غنوة
عايشة في قلبي
وكياني
حبك غيَّر حياتي
نوَّر أيام زماني
*********
خدني لدنيا أجمل
م الحلم وم الحقيقة
خلاني أحب عمري
وأخاف تفوت دقيقة
*********
ما نحبش بعض فيها
ما نحسش لحظة بيها
*********
حبك خلاني أحب
الناس والطير
والشجر
حبك علِّمني أحب
الليل ونجومه
والقمر
علِّم قلبي الهوى
علِّم عيني السهر
وبقينا واحنا سوى
ملايكة مش بشر
*********
حبك بالنسبة ليَّا
أجمل شيء في الوجود
حبك يا نور عينيَّه
جنة وما لهاش حدود
*********
حبك خلاني أعيش
في دنيا ماتنحكيش
أفراحها ما تنتهيش
أيامها ما تتنسيش
*********
الشمس الليلة طالعة
تنوَّر ليل فراقنا
وتقول أنا بكرة راجعة
خلاص احنا اتفقنا
*********
الشمس حنيِّنة
خايفة على حبنا
بتقول مهما افترقنا
مسيرنا لبعضنا
*********
مال الهوى ماله
مال الهوى بينا
كسَّر مراسينا
لا عرفنا فين جابنا
و لا فين مودِّينا
*********
تاهت خطاوينا
والبحر هاج يا خال
و لا شط و لا مينا
والموج كأنه جبال
*********
وغِرقتِ يا سفينة
في بحر ماله قرار
ويا ريتنا ما نسينا
إن الهوى غدَّار
*********
ياما م الهوى قاسينا
ياما م الهوى شفنا
لياليه تبكِّينا
وعنه و لا تبنا
*********
طبع الهوى فينا
مين اللي قِدروا
عليه
داحنا اللي بإيدينا
بنرمي روحنا فيه !
*********
مهما يبكِّينا
و لا نشوف منه
طبع الهوى فينا
ما لناش غِنى عنه
*********
مال الهوى ماله
نادى لنا روحنا له
أتاري اللي بيروح له
بيبكي على حاله !
*********
راحوا الحبايب
راحوا الحبايب كلهم
وبقيت وحيد
إزاي يا قلبي بعدهم
ها تعيش سعيد ؟!
راحوا الحبايب وانطفت
كل الشموع
كل البيبان اتقفلت
و مفيش رجوع
*********
ما بقاش لا فرح ولا هنا
ما بقاش ياعيني فاضل لنا
غير الدموع
*********
وتمر أيام عمرنا
ولسه فاضل دمعنا
والشوق بيجري في دمنا
وبيكوي في قلوبنا الحنين
عايشين ومش عايشين
صابرين ومش قادرين
*********
وكل يوم .. ..
أتخيِّل العمر اللي فات
من غير ما أحس
يشدني شوقي لبحر الذكريات
أغرق في دمعي
وأفوق على جبل الآهات !
*********
يا مركب العمر الحزين !
ليه النجوم متفرقين ؟!
والشمس غايبة عن العيون
والدنيا ليه
دنية فراق ؟!
مع إننا عايشين بنحلم باللقا
والقلوب زي الورود متشوَّقة
حتى العيون متشوقة
عايشة بتحلم باللقا
يمكن في يوم بعد الفراق
من تاني تتلاقى الإيدين
أحلى الأيام
أحلى الأيام خَدوها
خَدوها من عمرنا
واللحظة اللي فاتوها
فاتوها لمرِّنا
*********
ما فاتوش غير ذكريات
حزن وسهد وآهات
ودموع على حب مات
وجراح ما لهاش عدد
*********
ويلوموا علينا واحنا
بإيديهم انجرحنا
قاسيين ما في حد فيهم
فكَّر مرة يريَّحنا
*********
وتدور ينا الليالي
في موج غدار وعالي
وبير الصبر خالي
وبينا وبينه سد
*********
دابت حبال الصبر
في إيدينا ولا دبنا
واللي سقونا المر
أهالينا وحبايبنا
*********
ونقول بكرة الزمان
ينسينا اللي كان
ونعيش لحظة أمان
في قلوبنا تتولد
*********
الليل بهمومه عدَّى
ونهار الفرح هدَّى
طرحت في قلوبنا وردة
وردة حب ومودة
*********
قالت للشوق عيونَّا
دا احنا قدامنا جنة
أبوابها مفتوحة لنا
لكن ما في غيرنا حد
*********
أُمال فين الحبايب
والصُحبة والقرايب
وازاي نتهنى إحنا
وحبيب القلب غايب
؟!
*********
من غير أغلى الأحبة
الجنة تبقى نار
وقلوبنا تتوه في غربة
تتوه فيها للأبد
*********
يا ريت
أنا حاسس إنك مش ليَّا
مع إنك بتشاوري
عليَّه
وبترسمي إسمي على شفايفك
وعينيكي بتضحك
لعينيَّه
*********
يا ريت إحساسي ما يتحقق
يا ريت يا حبيبتي
ما نتفرَّق
وتكوني قسمتي ونصيبي
وأشوفك دايما
حواليَّه
*********
باحلم بك دايما من صغري
وبحبك ولآخر عمري
و لا مرة هفكَّر يا حياتي
أنساكي ولو حتى
شويَّه
*********
دي الدنيا في بُعدك ليل وظلام
أشواك وجِراح وعذاب
وآلام
وف قربك نور وأمان وسلام
وجبينك بدري في
لياليَّه
*********
مش عايز م الدنيا هدية
مش عايز غير حبك
ليَّا
حِنية قلبك بالدنيا
وأنا قلبي محتاج حنية
*********
فاض بيا الشوق أنا فاض بيَّا
وانجرحت م السهد
عينيا
خايف يجي يوم تقسي عليَّا
وأنا قلبي مش حِمل
أسيَّة
*********
أتمنى ويوم ورا يوم بيمر
نتهنى بحبنا طول
العمر
و لا نبعد يوم و لا نتفرَّق
ونعيش مع بعض عيشة
هنيَّة
*********
الحب ده
الحب ده معمول من إيه
وحقيقة و لا خيال
عشاق
وازاي قلوبنا بتدوب فيه
وندوب معاها من
الأشواق
سألت غيري ياما عليه
زاد الجواب حيرتي
وغُلْبي
*********
سمعت م العشاق عنه
وقريت عشانه
ألف كتاب
ما قدرتش أفهم شيء منه
غير لما قلبي فتح
له الباب
روحي وجوارحي إليه حنُّوا
وبدأت أنا مشوار
حبي
*********
لحظة ما بتكون مني قريب
يهدى الفؤاد وجراحه
تطيب
ولما تبعد ولا تغيب
ما يشفنيش و لا ألف
طبيب
إنت منايا يا أغلى حبيب
خليك معايا خليك
جنبي
*********
الحب كان عن قلبي بعيد
لا جه في كلامي و
لا همسي
وكنت فاكر نفسي سعيد
أتاريني بضحك على
نفسي
كنت هعيش طول عمري وحيد
من غير سبب وأنا إيه ذنبي
*********
الحب جه ما عرفشي منين
وعرف طريق قلبي
الخالي
غيَّر حياتي في غمضة عين
بقى كل شيء بالنسبة
لي
وبعد غُلب وصبر سنين
آن الآوان وفرح
قلبي
*********
عايز أشوفك
عايز أشوفك دايما دايما
مش بس في أحلامي
عايز أشوفك كده بعينيَّ
حقيقة قُدَّامي
عايز أشوفك وأسمع صوتك
بيأكد لي كلامي
عايز أحس بشمس وجودك
بتنور أيامي
*********
عايز أشوفك كل دقيقة
عايز أحس إن انتي حقيقة
*********
أول مرة أشوف الدنيا
زي الجنة .. .. زي الجنة
زي ما كنت زمان بتمنى !
وانتي معايا
طايرين فيها وبنتهنى
*********
عايزك تفضلي دايما جنبي
تسكني جوه في أحضان قلبي
*********
خايف م الأيام الجاية
لتبعدنا شوية .. .. شوية
وتقسى قلوبنا
وننسى هوانا
ويصبح حبنا بعد فراقنا
زي الدم ما يصبح ميَّة
خايف م الأيام الجاية
*********
نبكي
نبكي في الحزن نبكي
نبكي في الفرح نبكي
وفي أوقات الفراق
وفي أوقات اللقا
*********
دايما دمع في عينينا
دايما من يوم ما جينا
دمعتنا قريبة
وقلوبنا متغلِّبة
*********
وان يوم خِلِصت دموعنا
يكبر ويزيد وجعنا
*********
لا في قربنا مرتاحين
و لا حتى في بُعدنا
ليلنا دايما حزين
وان عدَّى يا سعدنا
*********
نضحك للناس ونتبسِّم
ونبيِّن الأفراح
واحنا قلوبنا بتتألِّم
وبتقاسي م الجراح
*********
سهر الليالي
سهر الليالي
جرَّح جفوني
يا ريت يا غالي
ترحم عيوني
*********
ارحمني يا ظالمني
من طيفك ليه تحرمني
كلمني وطمني
فيها إيه لما تطمني
*********
كل النجوم
تشهد عليَّه
ما في حتى يوم
نامت عينيَّه
سهران حيران
وف قلبي الشوق ولهان
مستني تصالحني
وتعوضني الحرمان
*********
زعلني ليلة
وفرحني شهر
ما بيدي حيلة
دا بيدي جمر
*********
وانا صابر وبكابر
مع إني خلاص مش قادر
أتحمِّل وأكمِّل
قصة حبنا للأخر
*********
اشتقت لك
حن القمر
وندهت لك
يا ابو قلب حجر
كلمتك وحايلتك
وعاتبتك على بُعدك
وسامحتك وصارحتك
أنا ما لي حبيب من بَعدك
*********
كلمني مَرة
وانسى اللي راح
الفرقة مُرة
تحي الجراح
*********
بتبكي ليه ؟!
بتبكي ليه وتبكيني
فاكرة البكا هيريحني
عمر الدموع ما تنسيني
اللي غدر بي وجرحني
*********
جرحتي قلبي ف يوم عيده
سقيتيه بدال الفرح جراح
وبدال شموعه ما يقيدوا
قادت مكانها بكا ونواح
*********
عذبتي قلبي وإحساسي
ولعبتي ياما بمشاعري
وانا أقول فداكي أهلي وناسي
أه يا نا من طولة صبري
*********
علمتي قلبي ازاي يقسى
من طول ما كنتي بتقسي عليه
دلوقتي هو قِدر ينسى
ينساكي من قبل ما تنسيه
*********
كل اللي كان بينا هدمتيه
وهدمتي قلبي اللي ندهلك
لو بالدموع تقدري تعيديه
كانت دموعك تشفع لك
*********
أشوف دموعك ألوم نفسي
واسمع كلامك أتأثر
واسهر ما بين حيرتي ويأسي
وأقول ده بخت ومتقدر
*********
مش يمكن اللي انتهى بينا
يعود وترجع أيامنا
واللي في يوم باعنا وخانا
يندم في لحظة ويصفى لنا
*********
يا جمال دمياط
الله الله يا جمال دمياط
شهد مكرر زي الشربات
عناقيد سكر وبلح أمْهات
أحلى من كل الحلويات
*********
أنا عايزة جهاز يا حبيبي جِنان
جاي من شارع عبد الرحمن
والزفة الحلوة الدمياطي
اللي تشرَّف كل العِرسان
*********
وقبل الشبكة وقبل المهر
طير بينا قوام على رأس البر
ودينا الجربي السياحية
دي الليلة أحلى ليالي العمر
*********
أنا عايزة الناس يفرحوا ويايا
أرقص يرقصوا ويغنوا معايا
وتزيد فرحتي مع فرحتهم
ونعيش ليلة بألف حكاية
*********
شوف فستاني شوف يا جماله
عمرك شفت يا روحي مثاله
و لا الطرحة آه م الطرحة
بدر منوَّر هل هلاله
*********
فرحة قلبي وانتم جنبي
بالدنيا كلها يا حبايبي
فرحة تكفي العالم كله
وتنسيني كل متاعبي
*********
أحلى وأجمل ليلة في عمري
مش عايزاها تخلص بدري
عايزاها تبقى العمر بحاله
بس عقارب الساعة بتجري
*********
قيدوا شموع الفرْح قيدوها
وانسوا دموع الحزن انسوها
واسهروا وافرحوا وارقصوا ليلة
كنتوا معايا بتتمنوها
*********
لما انت بتتعب
لما انت بتتعب كده من النار
وخايف قلبك ينكوي بيها
ليه كنت بتلعب بقى بالنار
و لا مرة حاولت تطفيها
*********
واخترت وقلبك نفسه اختار
الهوى والهوى صعب يا صاحبي
استحمل بقى وبلاش أعذار
دا الهوى غدار واسأل قلبي
ودي ناره لسه حاسس بيها
*********
بتقول هتتوب لالا مش هتتوب
الهوى ما في منه يا صاحبي هروب
الهوى غلَّاب وعذابه عذاب
وقلوبنا في بحره عسل بيدوب
وحلاوته ما تقدرش عليها
*********
بتقول لي ده بختك ونصيبك
وهتصبر بقى لاجل حبيبك
لو كان كده زي ما بتقول لي
إزاي كان يرضى بتعذيبك
خد مني نصيحة اعمل بيها
*********
الحب اللي انت بتتمناه
وغلبت يا صاحبي تجري وراه
الحب ده موجود في الأحلام
و لا عمرك في الدنيا هتلقاه
ما هو أصله مش موجود فيها
*********
على راحتك لو كنت مصدق
إن الأحلام راح تتحقق
عيش في الأوهام خليك في منام
بس اصحى قوام قبل ما تغرق
فوق قبل
*********
بأمر الفراق
النهاردة كلنا متجمعين
متجمعين هنا كلنا بأمر الفراق
النهاردة بنشرب الشوق والحنين
متدوبين ةيا الهنا في كاس الأشواق
كلمة واحدة هي اللي هتطفي شموعنا
كلمة واحدة بس وهتنزل دموعنا
كلمة وداع
كلمة وداع
*********
كلمة واحدة ينتهي بيها
لقا الأحباب في ثانية
ونفترق عن بعضنا واحنا
بنحلم بالتلاقي مرة تانية
كل واحد مننا
عارف طريقه
بس مش قادر يروح
من غير رفيقه
*********
كلنا اتعودنا نبقى
قلب واحد
قلب واحد
كلنا عايشين بنبضه
لكن الأيام كده
دايما تباعد
كل حي هيكمِّل
المشوار لوحده
*********
من سنين زي النهاردة
احنا اتقابلنا
والفراق عمره ما كان
يخطر ببالنا
النهاردة كلنا متجمعين
متجمعين هنا كلنا بأمر الفراق
النهاردة بنشرب الشوق والحنين
متدوبين ةيا الهنا في كاس الأشواق
*********
متغربين
صبر السنين عدَّى السنين
قدَّرنا ع الشوق والحنين
دلوقتي فين الصبر فين
ولإمتى نفضل متغربين
آخر لقا بينا كان من سنين
زمان لما احنا كنا لسه صغيرين
كانت الحياة قدامنا والأحلام ملكنا
والفرحة من حوالينا ملاك من سننا
عشنا أحلى السنين وقلوبنا فرحانين
وف لحظة فرقونا وخدونا من بعضنا
ولقيت نفسي لوحدي عايش في الدنيا حزين
خايف العمر يعدِّي واحنا متفرقين
عايش مع ذكريات أحلى وأغلى البنات
وصورتها جوه قلبي هيَّ أقرب صديق
طيفها مرسوم في بالي ولا غاب يوم عن خيالي
ده مسهرني الليالي مشغول عن كل شيء
مهما يطول الزمان عمري ما هنسى اللي كان
هفضل فاكره عشان حب بحق وحقيق
نسيت نفسي نسيت مشواري
ومشيت في الطريق مش داري
وطلعت ونزلت حواري
حسيت إني فيها غريق
أتاري مشيت على ناري
وصلني اشتياقي لداري
ولدار اللي ساكنة قراري
في الحي العتيق
وقفت وفؤادي بيجري
من طول اشتياقه
في صدري
وانا خايف ليكشف ستري
وان كان حبي حب بريء
طاوعته ورفعت عينيَّه
وانا أملي تطل عليَّه
ونسيت كل شيء حواليَّه
غير قلبي الجريء
شوية ولمحت قبالي
إنسانة غير اللي في بالي
مش هيَّ اللي ساكنة خيالي
و لا هيَّ اللي اللي فيها بفكَّر
إحترت وفؤادي احتار
وسألني وكله مرار
مش هي دي
برضه الدار
جاوبته ده أمر يحيَّر
لو كانت صحيح دي دارها
طب هيَّ إيه اللي جرى لها
ومين اللي ساكنة مكانها
وإيه في الأمور اتغيَّر
دلوني يا ناس دلوني
وخدوني لحبايبي خدوني
ودوني لضي عيوني
دا انا عمري عليها بأدوَّر
سمعوني الجيران وشافوني
شافوني ولا عرفوني
من طول الفراق نسيوني
ما هو أصل الفراق بيأثر
سألوني انت جي لمين
قلت لهم لناس غاليين
كانوا من سنين ساكنين
في الدار دي اللي نورها منوَّر
قالوا لي يا ألف خسارة
ما رحلوا وسابوا الحارة
قالوها بكل مرارة
وعينيهم بالدموع بتغرغر
قلت لهم يا ترى راحوا فين
قالوا لي احنا مش فاكرين
ده شيء فات بقى له سنين
من سبع سنين واكتر
ثار قلبي وصرخ في ضلوعي
وعينيا ملتها دموعي
وفقدت الأمل في رجوعي
ألاقيها في يوم أو أقرَّب
يا طير السما يا مهاجر
أنا زيك بقيت مش قادر
غير إني ألف وأسافر
واتعذب بعيد واتغرَّب
وسافرت وبعدت بعيد
ما أنا عمري قضيته وحيد
والغربة مش أمر جديد
و لا منها حاولت أتهرَّب
وحاولت إني أطفيِّ حنيني
وأقول بُعدي هينسِّيني
وانا عارف إني مهما حاولت
مش هقدر أعيش من غيرها
و لا بد إني هارجع تاني
على أمل إني يوم أقابلها
*********
عمري ما أصدَّق
والله عمري ما أصدق
عمري والله ما أصدَّق
قلبك انت يحب ويعشق
قلبك انت يعشق
*********
تحلف مهما تحلف والله
عمري والله ما أصدق
قلبك انت يعرف مرَّة
إنه يهوى ويعشق
*********
الحب في نظرك مش غير
ضعف واستسلام
وانت قلبك ما له ضمير
دايما ظلَّام
*********
ياما دق الحب بابك
ياما وانت قلت لأ
ياما داب قلبي في عذابك
ياما وانت قلبك ما رق
*********
النهاردة انت اللي بتقول لي بحبك
والله عمري ما أصدق
مهما تحلف إنها من جوه قلبك
عمري برضه ما أصدق
*********
إزاي أصدق بعد اللي كان
وأديك أمان
وأحب وأعشق نفس اللي خان
قلبي زمان
*********
مهما توعد مهما تحلف
مهما هتقول مش هصدق
بكرة تبعد بكرة تخلف
أي وعد وأي مبدأ
*********
قلبي م اللي جرى له منك
مستحيل يحب تاني
ضحَّى قلبي
كتير في حبك
وانت كان قلبك أناني
*********
فرحة قلبي
الفرحة مش سايعاني
دي الفرحة مخلياني
أعيش في جو تاني
مليان حب وأغاني
*********
فرحة قلبي بهواكي
فرحة عيني بلقاكي
يا جنتي يا ملاكي
إنتي يا أغلى الأماني
*********
يا نجومي يا بدوري
يا ورودي يا زهوري
يا أفراحي وسروري
يا أحلى ما في زماني
*********
لما كان قلبي خالي
كنت بخاف م الليالي
أصبح حبك يا غالي
حصني وبري وأماني
*********
يا بدر نورك فين
من نور حبيب العين
ده نور حبيبي بيهديني
وانت نورك جفاني
*********
الشوق يا روحي جابنا
بعد ما دوِّب قلوبنا
وندمنا واتعاتبنا
ورجعنا لبعض تاني
*********
و لا دام بينا خصام
و لا دام غير الغرام
كأنه كان منام
لكن هجرك كواني
*********
قالت
قالت أحلى كلام في الحب
قالت أحلى كلام يتقال
كلمة في كلمة داب القلب
وبقيت أنا مشغول البال
*********
مع إنه كلام كدب في كدب
إنما قلبي إليه كان مال
وانا قلبي مناه إنه يحب
حتى ولو كان كله خيال
*********
أشتاق والشوق له ألف دليل
واعشق وانا حظي تملِّي قليل
واحلم وأعيش على حلم جميل
واتمنى لو طال عمري وطال
*********
وكفاية سنين من عمري سنين
ضاعت في هموم وشجن وحنين
*********
إكدبي يا عينيا إكدبي يا سطور
خليني أشوف في هوايا النور
وأعيش مع حبي في هنا وسرور
ويكون لنا سوا قِصة وموال
*********
احسبي عمري
إحسبي عمري اللي عدَّى
وسنين عمري اللي جايَّة
تلاقي ان النهاردة
أجمل أيام هوايا
ولأول مرة قلبي
يردد صوت غنايا
ويقول طول ما انتي جنبي
هانسى تعبي وشقايا
وتهون كل الجراح
تهون وانتي معايا
و لا أفكَّر في اللي راح
وأقول حبك كفاية
قمرين
قمرين والله قمرين
في الكوشة منورين
وحبايب ع الشمال
وحبايب ع اليمين
حلوين صدق اللي قال
على بعضهم لايقين
والكل الليلة شايف
أحلى وأجمل عروسين
والبسمة ع الشفايف
والفرحة في العينين
يا مجمَّع الحبايب
جمَّعت بين قلبين
في ليلة حب دايب
فيها الشوق والحنين
يا أغلى وأحلى فرحة
دوِّبتي شوق السنين
دلوقتي قلوبنا طارحة
ورد وفل وياسمين
عروستنا بدر التمام
في جمالها والله آية
وعريسنا راجل هُمام
إختار زينة الصبايا
دي أصيلة وبنت عيلة
يا هناه بيها العريس
أحلى الأفراح الليلة
قيدوا كل الفوانيس
كفاية بكا !
كفاية بكا وعذاب
كفاية يا عيني بكا
أنا يا اللي قلبي داب
م الحب واشتكى
ما عرفنا انه كان كداب
حكاياته متفبركة
وغرامه حقيقته سراب
رمال متحركة
*********
ما هو عمر الدموع ما بتنفع
وعمر اللي راح ما هايرجع
وانا حتى خلاص مش هاسمع
لكلامه ده مهما حكى
كفاية بكا وعذاب
كفاية يا عيني بكا
*********
ما قدرتش ودمعي غلبني
وفوق خدي سال
وقلبي فضل يعاتبني
ويقول بخته مال
أنا اللي الهوى عذبني
وحزن قلبي طال
حبيته ليه يخدعني
هو احنا في معركة
*********
غيابك طال
سنين بتفوت وراها سنين
وعمر يضيع في شوق وحنين
و يبكي القلب قبل العين
وقلبي من الفراق بيدوب
*********
يا ليل ما بينتهيش في سلام
يا سيل م الوَحْشة والأوهام
طويل وبيحسبوك ايام
وكله من عمرنا محسوب
*********
غيابك طال و طال سهري
و غابت شمسي غاب قمري
و انا صابر على قدري
وقدري ع الجبين مكتوب
*********
وحيد انا و وانت عني بعيد
عليك مشغول و فكري شريد
و حيرتي كل يوم بتزيد
وقلبي بين شروق وغروب
*********
ما هو انت بجد اغلى حبيب
و صورتك عني مش بتغيب
و إسمك فوق لساني قريب
في بعدك عمري مش محسوب
*********
حبيبي لإمتى اترجاك
و اعيش احلم سنين بلقاك
ما هو انت أخدت روحي معاك
و روحي من الفراق بتدوب
*********
حبيبي ارجع تعال قوام
كفايه بعاد كفايه حرام
خلاص ما فاضلش غير ايام
يا دوب تكفي سلامنا يا دوب
*********
رفعوا الستارة
رفعوا الستارة وطفُّوا النور
ولقيت حياتي شريط بيدور
فيه المَشاهد بالتفصيل
حتى اللي كان مخفي ومستور
قدام عينيَّه في ظرف ساعات
شفت اللي عشته سنين وشهور
وشفت واحد شبهي تمام
وكان بيلعب نفس الدور
والناس بتهتف له بإعجاب
ويصقفوا له بكل سرور
بس الحقيقة غير التمثيل
ما هو أصله نجم وله جمهور
أنا مش ممثل و لا فنان
و لا حتى كومبارس ومغمور
أنا اللي ليل ونهار شقيان
وف ساقية داير زي التور
غرقان في بحر من الأحزان
وكل ليلة أبات مقهور
أنا اللي عشت سنين حرمان
وشربت كاس الصبر بحور
مين اللي مرتاح ؟!
مين اللي مرتاح
الغني و لا الفقير
الساعي و لا البيه المدير
الصغير ولا الكبير
مين اللي مرتاح
نفسي حد يقول لنا
ومنين نجيب الراحة
حد يدلنا
و لا تكون الراحة سافرت من زمان
من يوم ما غاب الحب عنا والأمان
من يوم ما بقى للكره في قلوبنا مكان
و لا عاد لا خوف من ربنا
ولا عاد ضمير
مين اللي مرتاح
نفسي حد يقول لنا
ومنين نجيب الراحة
حد يدلنا
كتروا الأطبا
بس فين هو الدوا
لو فيه محبة
كنا خفينا هوا
عايشين سوا
وكل واحد فينا
روحه في شرنقة
متعلقة
في خيط حرير
مين اللي مرتاح
نفسي حد يقول لنا
ومنين نجيب الراحة
حد يدلنا
العين بتيكي
وبإيدها إيه
غير الدموع
والقلب بشكي
بس محبوس في الضلوع
والعمر بيدوب
يوم بعد يوم
زي الشموع
ما فاضلش يا دنيا لنا
إلا أمل واحد أخير
الحب يرجع م السفر
يطلع من العتمة قمر
ينزل على قلوبنا مطر
يطرح لنا أفراح كتير
أفراح تكفي كل دار
وتخلي ليل الناس نهار
نرتاح نقول بعد انتظار
الدنيا لسه فيها خير
نفسي سفينة حبنا
نفرد لها تاني الشراع
نوصل بها لبر الهنا
نبعدها عن شط الضياع
*********
كنت فاكرة !
كنت فاكرة مع الأيام هقدر أغيَّرك
وأزرع الأشواق في قلبك
اللي عمره في يوم ما حن
زي ما يكون هو مات !
إلتقيتك زي ما كتير قالوا عنك
زي ما كتير حذروني
وخوفوني ياما منك
بعت قلبي وبعت حبي
وبأرخص تمن
ياما ياما خوفوني
من عينيك
ومن كلامك
ياما ياما حذروني
من هواك ومن غرامك
بس مكتوب ع الجبين
إني أقابلك .. .. إني أحبك
وأنسى كل كلام سمعته
بيوصف لي غدرك
وأنخدع زي اللي قبلي
وأنكوي بنارك زمن
نفسي أنساك وأنسى ويَّاك كل اللي فات
عايزه أنساك بس يا ريت إني أقدر
لو بعادي هاينسيني أبعد تاني أكتر
مش بإيدي كل ما ابعد ألقى شوقي إليك يزيد
مش بإيدي إن حبك جوه قلبي نار بتقيد
كل ما أحاول أطفيها ببعاد
كل ما أفتكر إنها باتت رماد
الحنين والشوق يحيوا الحب تاني
والتقيني غصب عني راجعة وبقلبي وكياني
راجعة تاني بلهفة أكتر
راجعة تاني بحب أكبر
حب أكبر م اللي فات !
*********
ليه ؟!
ليه ليه ليه
ليه يا قلبي ليه
ليه التقل ليه
ليه الحيرة ليه
ما كفاية اللي احنا فيه
ده احنا ما نقدر عليه
*********
جنبي وبين إيديا
وانا بأدوَّر عليه
وبيبقى قدام عينيا
وليه مش شايفه ليه
ليه ليه ليه
ليه يا عيني ليه
*********
وكتير يسأل عليا
وانا ما اسألش فيه
ولما يغيب شويه
أبقى هتجنن عليه
ليه ليه ليه
ليه يا قلبي ليه
*********
ما هو كان دايما بيتقل
قلت انا ما اتقلش ليه
خلاني أبطل أسأل
مع إني روحي فيه
ليه ليه ليه
ليه يا حبيبي ليه
*********
وياما كنت أزعل
وزعلي يهون عليه
لكن ده مهما يحصل
أنا برضه شاريه
مهما يتقل شاريه
ما انا روحي دايبة فيه
*********
رأس البر
لرأس البر أنا حنيت
وزاد الحر شوقي فجيت
أشوف البحر يضحك لي فأضحك له
وأرمي همومي بين موجه
فيحكي لي النسيم حواديت
وطول الليل يغني لي
و لا في مرة أنا مليت
*********
يا موج البحر سمَّعني
على كيفك غنا ومواويل
وخدني بس رجعني
لحضن النيل
وخد روحي وخد عمري
وخد من دمي لو حبيت
وسيب النيل هنا يجري
ويروي الزرع يروي الغيط
*********
أنا عارفك قوي وغدَّار
وقلبك فيه كتير توابيت
يا بير مجهول ما لهش قرار
بتلعب فيك حدا وعفاريت
أنا جايلك تفرحني تريحني
تنسيني هموم دنيا بتلعب بي
بتجرحني بتدبحني
وعشمان فيك تواسيني ترسِّيني
ألاقي نسيمك الصافي
في عز أماني يتحوِّل لشوك سكاكين
وألاقي موجك الدافي
في غمضة عين بيغزل لي في أكفاني
كأني بين إيدين شياطين
عجيبة إنك بتخدعني
وأغيب عنك شهور وسنين
ولما بكلمة تندهلي
ألاقيني قوام لبيت
تكون طيبتي أنا خيبتي
ونقطة ضعفي ومصيبتي
بصدق كل قول يتقال
ولما أفوق على الكذبة
والاقي ان اللي قال محتال
أصبر نفسي واتحجج
بأني نسيت !
ورجعت تاني
ورجعت تاني تسأل عليا
وتقول عينيك مشتاقة ليا
وتقول كمان واحشاك عينيا
آه يا قلبي من عينيك
ونسيت يا قاسي
يا اللي كنت أقرب لي من أهلي وناسي
يا اللي كنت أحب ليا من نور عينيا
إنك انت اللي ابتديت
وبعدت عني هجرتني !
لحظة ما كنت محتاجة ليك
ما فكرت فيا !
ما فكرتش إيه ممكن في بُعدك يجرى ليا !
آه يا قاسي
يا اللي كنت أقرب لي من أهلي وناسي
يا اللي كنت أحب ليا من نور عينيا
لساك فاكرني وفاكر القلب اللي ياما لعبت بيه !
قلبي اللي كنت بتخدعه مش سهل تاني تضحك عليه
ورجعت تاني بعد ما الأيام خدت لي حقي منك
بتقول عشاني وانت راجع غصب عنك مش بخاطرك
فاكر إني باستناك
عايشة على ذكراك
باستنى ترجع لي
ولما تنده لي
تلاقيني باجري عليك
واشتاق لأحضانك
خليك بقى خليك
عايش في أوهامك !
عزبة البرج
إتشوَّقت لسمك العزبة
أصل العزبة سمكها نضيف
مشوي ومقلي صينية وشوربة
أحلى وليمة في شتا أو صيف
أصلي عييت من سمك العلبة
آكله وأقول الطف يا لطيف
والمشكلة لو كانت ضاربة
والقاني ميت بالبولوبيف
أحكي عن الناس ولا النيل
ولا احكي عن البحر يا زين
أنا قلت في بحرك مواويل
بيغنيها الصيادين
ع البحر اما الشمس تميل
أو مركب بين الشطين
مية جميلة وجو جميل
حاجة تسر الروح والعين
أحلى وأرقى أثاث معروف
أحلى وأشهى الحلويات
لف الدنيا بحالها وطوف
مش هتلاقي إلا ف دمياط
*********
عمري ما انسى حبيبي
أكدب لو قلت اني نسيته
ونسيت حبه لما جفاني
أنساه إزاي وانا حبيته
واتعلق بيه كل كياني
ما أقدرش أنساه أو أنسى هواه
روحي وقلبي بيتمنوا رضاه
من غيره حياتي ما تبقى حياة
ويكون لها معنى إلا معاه
وان غاب عن عيني
ولو لثواني
النوم يجافيني
وافرح لو جاني
أفرح لما أسمع صوته
وافرح لو قابلته وشفته
وأخاف الليالي يفوتوا
واصحى ما لتقيش غير صورته
خليك هنا جنبي ومتفارقنيش
خليك هنا جنبي
في بعادك أنا مش هقدر أعيش
و لا يقدر قلبي
و لا يقدر قلبي يتحمِّل غيابك ثانية
و لا تقدر عيني في بعدك تشوف الدنيا
إنت حياتي حياتي إنت حياتي
وعمري كله وآهاتي وذكرياتي
باشتاق إليك وانت جنبي وإيدي في إيديك
واخاف أغمض عينيى تغيب ما آلقيك
مكتوب
لي إيه
مكتوب لي إيه .. إيه تاني
غير البكا وغير الأحزان
إقرا اللي مكتوب يا زماني
إقراه على جبيني الغلبان
*********
يا دنيا ليه كده ظالماني
ما لقيت في حضنك أي حنان
دايما تزيدي في حرماني
وان رحت بحر ارجع عطشان
*********
ورضيت أعيش فيكي وحداني
من غير حبايب و لا خلان
الفرحة دايما ناسياني
وفي همي طول الليل سهران
*********
الفرحة والله واحشاني
مشتاق لها وبقالي زمان
ودموع عينيى كاوياني
نهار وليل أنا فيها غرقان
يا ليل طويل ومالوش آخر
احترت فيك ما لقيت لي دليل
همك يا ليل هم معافر
مين اللي يقدر بس يشيل
*********
والعمر سيف خاين غادر
والله يا ليل ده العمر قليل
فرَّقت
ليه بيني وبينه ؟
فرَّقت ليه بيني وبينه يا زمن
وقد إيه ومين دفع لك التمن
خدت إيه يا زمن آه خدت إيه
وقد إيه كان التمن كان قد إيه
تمن فراقنا
تمن بعادنا
تمن عذابنا
تمن سهادنا
واحنا ما صدقنا التقينا التقينا
من بعد غربة وطول فراق التقينا
ونسينا طعم البعاد
ونسينا لون السهاد
ونسينا أيام ياما فيها قاسينا
دي الليالي في بعدنا كانت طويلة
كل ثانية كنا حاسين إنها بيوم وليلة
والفراق قاسي ومش بإيدينا حيلة
هد آمالنا وأحلامنا الجميلة
خدت إيه لما فرقت انت بينا
خدت إيه لما وريتنا العذاب من بعد جنة
المؤلف في سطور
· المؤلف:
متولي محمد متولي بصل
مواليد محافظة دمياط - جمهورية مصر العربية
· أعماله:
- روايات: -
الربيع الذي لا يأتي؛
شعبان في خبر كان؛
العجوز والبحر
مكالمة بعد منتصف الليل
- مجموعات قصصية: -
الديك ذو العرف الأبيض؛
الحب في الوقت الضائع؛
مأساة حصان.
الرجل الذي سرق دبا ( قصص قصيرة جدا )
زلزال
يوم القيامة
- ديوان شعر فصحى: -
من يهتف في الميدان؛
بحار بلا مرسى؛
قبل أن ترفع الجلسة
- ديوان شعر عامية: -
نفسي
اشوف
النيل
بيضحك؛
ليه
يا
بلد؛
العمر
لحظة
حب
أغاني مصرية
يوميات رمضانية
· للتواصل مع المؤلف
الهاتف :
01095640130
01061289965
محتوى الكتاب
|
الموضوع |
الصفحة |
||
|
مونولوج أيوه موظف |
6 |
||
|
مونولوج الدنيا مظاهر كدابة |
10 |
||
|
مونولوج موس الحلاق |
14 |
||
|
مونولوج ولي العهد |
19 |
||
|
جهزي نفسك ! |
23 |
||
|
بيبان عليك |
25 |
||
|
لوم على قلبك |
29 |
||
|
تعالى نتوب |
33 |
||
|
حبك غنوة |
37 |
||
|
مال الهوى ماله |
37 |
||
|
راحوا الحبايب |
44 |
||
|
أحلى الأيام |
47 |
||
|
يا ريت |
51 |
||
|
الحب ده |
54 |
||
|
عايز أشوفك |
57 |
||
|
سهر الليالي |
62 |
||
|
بتبكي ليه ؟! |
66 |
||
|
يا جمال دمياط |
69 |
||
|
لما انت بتتعب |
73 |
||
|
بأمر الفراق |
70 |
||
|
متغربين |
79 |
||
|
عمري ما أصدَّق |
86 |
||
|
فرحة قلبي |
89 |
||
|
قالت |
92 |
||
|
احسبي عمري |
94 |
||
|
قمرين |
95 |
||
|
كفاية بكا |
97 |
||
|
غيابك طال |
99 |
||
|
رفعوا الستارة |
102 |
||
|
مين اللي مرتاح |
104 |
||
|
كنت فاكرة |
108 |
||
|
ليه ؟! |
111 |
||
|
رأس البر |
114 |
||
|
ورجعت تاني |
117 |
||
|
عزبة البرج |
119 |
||
|
عمري ما انسى |
121 |
||
|
مكتوب لي |
123 |
||
|
فرقت ليه |
125 |
||
|
الكاتب في سطور |
127 |
||
|
محتوى الكتاب |
129 |
||
ليست هناك تعليقات:
إرسال تعليق